જન્મ દિવસની પૂર્વ સંધ્યાએ – ઓગસ્ટ ૨૯, ૨૦૧૪. સાઠ દિન કે સાઠ વરસ – શરૂઆત કે…… August 29, 2014

મિત્રો, 

કાલે મારો ૫૯ મો જન્મ દિવસ છે. એક મુકામ તરફનું પ્રયાણ છે. આમ તો મજાનો માદ હોય પણ હવે સાઠે પહોંચવાની ચિંતા પણ હોય એ સ્વાભાવિક છે એવું મારું માનવું છે. આજે જ એક ગઝલ ના.. ના.. હઝલ નો અયોગ બન્યો તો લખાઈ ગઈ. આશા છે આપને ગમશે.

સાઠમાં પ્રવેશ!

ઉજવાય છે આજે જુઓ મારો જનમ દિન તાનમાં!

દાખલ થયો છું આજથી મારા વરસ આ સાઠમાં!

સાઠે એતો નાઠી એવી કહેવત ઘણી ચર્ચાય છે,

કોને ખબર મારી હશે બુદ્ધિ યથાવત સાથમાં!

છે પાનખર બેઠી મથાડે આમ તો વરસો થયાં,

બદલાણ કેરી રાહ હું જોયા કરું છું ખામખાં!

સોડા અને આચર-કુચર ખાતો નથી દસકો થયો,

પડતો નથી તો પણ તફાવત એજ મારી ફાંદમાં!

ધોળાં થયાં છે વાળ સૌ માથે અને બીજે બધે,

પખવાડિયે કાળો કલર કરતો રહું છું વાળમાં!

“જગદીશ” તારા આયખાની છે ઉપજ તો એટલી,

ભેગી કરી સંભાળથી યાદો બધી લે બાથમાં!

જગદીશ ક્રિશ્ચિયન – જન્મ દિવસની પૂર્વ સંધ્યાએ – ઓગસ્ટ ૨૯, ૨૦૧૪.

છંદવિધાન: ગાગાલગા ગાગાલગા ગાગાલગા ગાગાલગા